Christine Mulder
Stien van anne
Schriefografie
Christine Mulder wodde in 1973 in Wolvege geboren. Op 'e legere schoele en et voortgezet onderwies schreef ze al graeg gedichten en verhaelen. Tussen 2007 en 2010 schreef ze onder pseudoniem Reisje Rot kollums in 'De Reisrevue' . Disse kollums in et Nederlaans gongen over et wel en wee op een reisbureau. Want ondaanks dat d'r thuus wel zo now en dan Stellingwarfs praot wodde, is Christine mit de Nederlaanse tael opgruuit. Eins vremd, omdat opa Jannes Nijholt medeoprichter van de Stellingwarver Schrieversrondte is en veul deed mit en veur de Stellingwarver tael. Ok vader Anne Mulder was een liefhebber van et Stellingwarfs en het tegere mit moeder Wiesje (en veul aanderen) is d'r mitwarkt an et Stellingwarver woordeboek. De Stellingwarver tael zat Christine dus beslist in et bloed. Naodat ze in 2000 een cursus Stellingwarfs deed, is dat bloed borrelen gaon en het ze meer daon in et Stellingwarfs. In 2003 debuteerde ze mit de dichtbundel 'Storm in et Leven' waorin stokmennig gedichten staon die ze schreef nao et plotseling wegraeken van heur heit. De eerste oplaoge van 300 stoks was binnen een peer weken uutverkocht. Biezunder, al helemaole veur een dichtbundel in streektael. Veur stokmennig kotte verhaelen die onder ere in De Stellingwarf publiceerd weren en ze op verzoek veurlas op diverse bi'jienkomsten, wun Christine in 2006 de Stellingwarfer Schrieveri'je pries.
In de tied dat ze moeder van drie jonge kiender was, wodden d'r veural kienderverhaelen schreven. Disse wodden nog altied wel bruukt bi'j perjecten veur legere schoelen. In 2010 verscheen et prenteboek 'Muske Tiemen' waorbi'j Christine zels biezundere illustraosies maekte van behangpepier. Et verhael in dichtvorm gaot over een joongien dat wel graeg wil vliegen, mar d'r uutaendelik aachter komt dat dat toch ok niet alles is. Omdat moeder wezen een protte tied kost, is de schrieveri'je een posien beparkt bleven tot mitwarken an perjecten as Eupen Stal en et Winterdoeboek van de Stellingwarver Schrieversronte.
Et leste jaor is d'r weer meer tied veur perjekten en veurdrachten. Ok gaot de penne weer vaker over et pepier en zullen d'r meer publikaosies verscheinen.
+31 (0)61 34 08 114
