Hieronder lees ie Christine's meerst recente bi'jdraoge veur Stellingwarver Zaeken

Vaege zaeken en zwaore smaeken - Geheime Stellingwarver gerechten deur Stien van Anne en Boele van Jan

Za’k je now es wat vertellen of hej’ ‘t al heurd. Van die opvretersbende lessend in de voetbalkantine? Robin van Henry en Jikke mos lessend een slim belangrieke wedstried voetballen, kriegt die aarme jonge morgens om een uur of aachte een tillefoontien dat de kantinedienst vergeten was veur gehaktballen te zorgen. En om reden Robin veur kok leert, kreeg hi’j de balle toespeult. Eerst was hi’j lelk. Mar doe hi’j goed wakker was vun hi’j et ok wel mooi; dattig man van de sokken blaozen mit zien op schoele al beroemde gehaktballen. Zo doende toogde hi’j zaoterdagmorgen om half negen al noar de supermaarkt veur een tasse vol mit vleis en wat as hi’j nog meer neudig had en om goed half twieje ston hi’j mit vierendattig vasse gehaktballen in de kantine.
Robin gong zo op in de wedstried, dat hi’j niet markte dat langes de kaante iederiene meer as gewoonlik op ‘e tillefoon an et kieken was. Hi’j zat best in de wedstried en de veursprong mit de pauze zollen ze niet ofpakken laoten. Hi’j had netuurlik ok niet heurd wat d’r in de pauze in de kantine gebeurde. Dat vertelden ze him doe hi’j in de dadde menuut van de twiede helte naor de kaante haeld wodde. Zien gehaktballen weren viraol gaon. Zels de korfballers weren onderwegens om een gehaktballe te haelen. En d’r weren nog mar vuve over. Iene van de tegenstanders hadde al een stompe op ‘e neuze had, omdat hi’j him een balle toe-eigend hadde wiels et zien beurt nog niet was. As d’r mit de dadde helte gien ballen meer weren, kregen zeker en vaaste een reboelie van komsa. D’r was al iene die de supermaarkten ofgong om zo vule meugelik gehakt op te haelen, dan kon Robin drek an et wark. Onderwiels zien team de veursprong uut hanen gaf, scheuf Robin flinke perti’jen gehaktballen in de ovend, mar ok in die van de buren, zien beppes en femilie en vrunen. Et verlengen van de wedstried het zowel zien team as Robin zels redded. Ketier veur vuven, lagen d’r in de kantine 300 gehaktballen klaor, die veur iene dadde helte van korfballers en aandere tegenstaanders vrunden maekten.
Neudig veur drieje van Robins gehaktballen
300 gram gehakt naor keuze
3 snegies (old) brood naor keuze
½ koppien melk
1 sjalot (geraspt)
1 ei
1 mespunt nootmuskaat
1 mespunt kardemom
1 theelepel maelde zwarte peper
1 theelepel vasse gember, raspt/fien sneden
2 mespunten chilipoeder
1 theelepeltien zout
1 eetlepel ketjap
1 ofstreken theelepel kerriepoeder
roombotter

• Doe de melk in een grote koeme en laot et brood d’r in weken, zodat et zaachte wodt.
• As et broodi de melk goed opneumen het, et tevule an melk d’r mit de hanen uutkniepen.
• Doe et gehakt, et ei, de sjalot en kruden bi’j et natte brood in de koeme en kneedt alles hiel goed deurmekander.
• Verdiel et mingsel over et antal eters en maek d’r mooie ronden ballen van
• Braodt de ballen in een roeme panne in roombotter an, zodat et mooi bruun is an de buterkaante.
• Hael de ballen uut de panne* en leg ze in een invette ovenschaole.
• Dek of mit zulverfolie en 40 minuten op 180 graoden in de ovend ofbakken.

* et vocht uut de panne ku’j aj’ willen anlengen mit wat waeter en as jus gebruiken.